Qozog‘iston Mudofaa vazirligi harbiy yoshdagi fuqarolarga nisbatan uyushtirilgan reydlar yuzasidan tushuntirish berdi. Bu haqda Tengrinews xabar berdi.
Vazirlik ijtimoiy tarmoqlarda yoshlarning qo‘lga oliniib, harbiy idoralarga majburan yetkazilayotgani aks etgan videomateriallarga munosabat bildirdi.
Mudofaa vazirligiga yiliga ikki marta muddatli harbiy xizmatga chaqirishning amaldagi tartibini tushuntirish vakolati berilgan. Muddatli harbiy xizmatga chaqirish kampaniyalarida ayrim hollarda tegishli ravishda xabardor qilingan fuqarolarning mahalliy harbiy boshqaruv organlariga o‘z vaqtida yetib kelmasligi holatlari uchrab turadi.
Bunga harbiy yoshdagi fuqarolarni hisobga olishda ularning ko‘pchiligi ro‘yxatdan o‘tgan joyida yashamasligi, ko‘chganida esa yangi yashash manzili bo‘yicha ro‘yxatga olinmagani ham sabab bo‘lmoqda.
Amaldagi qonunchilikka muvofiq, chaqiruv varaqasini shaxsan topshirishning iloji bo‘lmasa, ularning kelishini ta’minlash ichki ishlar organlariga yuklatiladi, — deyiladi bayonotda.
Vazirlik reydlar chog‘ida fuqarolar ichki ishlar xodimlarining qonuniy talablariga bo‘ysunmay, qarshilik ko‘rsatayotganidan shikoyat qildi.
Bunday hollarda militsiya xodimlariga ularni majburan ushlash va yetkazish huquqi berilgan. Chaqiruv komissiyasi ularning maqomini belgilaydi. Muddatli harbiy xizmatga chaqirish uchun asoslar bo‘lmasa, uyiga yuboriladi, asoslar mavjud bo‘lsa, tibbiy ko‘rikdan o‘tish va chaqiruv doirasidagi boshqa tadbirlarni amalga oshirish uchun yo‘naltiriladi, — deya qo‘shimcha qildi vazirlik.
Qozog‘istonda qonunchilikda majburiy harbiy xizmatni o‘tashdan bo‘yin tovlaganlik uchun ma’muriy va jinoiy javobgarlik nazarda tutilgan.
Shundan kelib chiqib, fuqarolardan amaldagi qonunchilik talablariga rioya etishlarini hamda yolg‘on ma’lumotlarni tarqatmaslikni so‘raymiz, — deya xulosa qildi Mudofaa vazirligi.
Izoh (0)