Qozog‘iston musulmonlari diniy idorasi 16-iyunni Qurbon hayit bayramining birinchi kuni deb belgiladi. Musulmonlar idorasi Islomda muqaddas kunlar, kechalar va oylar qamariy taqvim bo‘yicha belgilanishini ma’lum qildi. Bu Oyning o‘zgaruvchan fazalari asosida hisoblanadi. Yangi Oy hilol ko‘rinishi bilan boshlanadi. Qamariy oy ba’zan 29 yoki 30 kun davom etadi.
“Zulhijja oyini aniqlash uchun Zulqa’da oyining 29-kunida oyning fazasi kuzatiladi. Agar quyosh botganda yangi oy chiqsa, keyingi kun Zulhijja oyining boshlanishi hisoblanadi. Agar havo bulutli va oy ko‘rinmasa, Zulqa’da oyi 30 kunga uzayadi. Yangi oy 2024-yilning 6-iyunida boshlangani sababli bu yil Zulhijja oyi 7-iyunda boshlanadi va arafa kuni 15-iyunga to‘g‘ri keladi, Qurbon hayit 16-iyun kuni boshlanadi”, — deyiladi musulmonlar diniy idorasi bayonotida.
Qozog‘iston Mehnat va aholini ijtimoiy muhofaza qilish vazirligi 17-iyun (dushanba) ish kuni bo‘lishini ma’lum qildi.
2024-yil uchun bayram va dam olish kunlari taqvimi tuzilgach, Qozog‘iston musulmonlari diniy boshqarmasi Qurbon hayiti 17-iyunga to‘g‘ri kelishi haqida rasman ma’lum qilgan edi. Endi esa Qurbon hayiti 16-iyunga to‘g‘ri kelishini e’lon qilishdi, dam olish kunlariga to‘g‘ri keladigan diniy bayramlarni keyinga qoldirish mumkin emas, — deyiladi vazirlik xabarida.
Izoh (0)