Kanaki-Yangi Kaledoniyadagi tartibsizliklar uchun bevosita Fransiya rasmiylari javobgar. Bu haqda Kanaka Milliy ozodlik fronti — FLNKS yetakchilaridan biri Jimmi Nauna ma’lum qildi.
Muallif The Guardian nashrida chop etgan maqolasida oroldagi tartibsizlik Fransiya prezidenti Emmanuel Makronning mazkur hududdagi o‘z taqdirini o‘zi belgilash jarayonini izdan chiqarishga qaratilgan siyosiy manyovrlarining bevosita natijasi ekanini ta’kidlagan.
Ikki hafta avval Numea poytaxtida boshlangan tartibsizliklarga Fransiya Milliy assambleyasida taqdim etilgan saylov islohoti to‘g‘risidagi qonun loyihasi sabab bo‘ldi, — deydi siyosiy yetakchi.
FLNKS harakati va uning ittifoqchilari saylov islohoti to‘g‘risidagi qonun loyihasi aprel oyida Makron hukumati tomonidan Senatga kiritilganidan beri unga qarshi chiqmoqda.
Hukumat arxipelag tub aholisining noroziligiga va bu yerda tartibsizliklarni keltirib chiqarishi mumkin bo‘lgan aniq belgilarga qaramay, qonun loyihasini ilgari surishga muvaffaq bo‘lgan.
Bu uning shaxsiy siyosiy manfaatlari uchun qilingan piar bo‘ldi. Hatto o‘z partiyasi ichida ham Makron qo‘llab-quvvatlovini yo‘qotgan. Uning Yangi Kaledoniyadagi vaziyatni boshqarishi siyosiy guruhlar tomonidan milliy miqyosda munozara qilinmoqda, — deya muallif Makronning avvalroq Yangi Kaledoniyaga tashrifini izohlagan.
Ma’lum bo‘lishicha, Makron Parijga qaytib, saylov islohotini milliy referendumga qo‘yish masalasini ko‘rib chiqqan.
Eslatib o‘tamiz, avvalroq Makron fuqaroviy tartibsizliklar va zo‘ravonliklar kuchayishi ortidan Yangi Kaledoniyaga tashrif buyurgan edi. Tartibsizliklar vaqtida Numea ko‘chalarida blokadalar o‘rnatilgan. Avtomobillar va korxonalarga o‘t qo‘yilgan. Do‘konlar talon-toroj qilingan.
Tahlilchilar Yangi Kaledoniya orolida tartibsizliklar yuzaga kelishiga bosh omil sifatida Parij tomonidan orolda saylov qonunchiligini o‘zgartirish to‘g‘risida qaror chiqarilishini keltirgan. Parijning tutgan yo‘lidan norozi olomon Numea ko‘chalarida g‘alayonlar uyushtirgan.
Izoh (0)