AQSH Davlat kotibi Entoni Blinken o‘t ochishni to‘xtatish kelishuvini tezlashtirish maqsadida Yaqin Sharqqa tashrif buyuradi. Bu haqda AQSH Davlat departamenti matbuot xizmati tarqatgan xabarga asoslanib, CNN nashri xabar berdi.
Manbada aytilishicha, AQSH kelishuvga erishish yo‘lida Isroil va HAMASga bosim o‘tkazmoqchi. Ushbu yo‘nalishdagi ilk harakat harbiy harakatlardan tanaffus eʼlon qilish hamda asirlarni almashishga qaratiladi.
Davlat departamenti matbuot kotibi Metyu Miller Blinkenning safarini tasdiqlagan. Davlat kotibi Yaqin Sharqqa: Misr, Isroil, Iordaniya va Qatarga “barcha garovga olinganlarning ozod etilishini taʼminlaydigan o‘t ochishni to‘xtatish kelishuviga erishish zarurligini muhokama qilish uchun” borishi aytilgan.
“Biz HAMASning AQSH chaqiruvlariga imkon qadar tezroq javob berishiga umid qilamiz va kutishda davom etamiz”, — degan Metyu Miller payshanba kuni bo‘lib o‘tgan matbuot brifingida.
AQSH rasmiylari o‘t ochishni to‘xtatish borasida Qatar orqali HAMAS siyosiy qanotiga murojaat yuborganini aytgan. Tashkilot rasmiylari so‘rovni hali ko‘rib chiqayotgani bois hozirchalik uni javobsiz qoldirgan.
Manbaga ko‘ra, Blinken uchrashuvlarda sulhni to‘xtatish taklifi isroilliklar va falastinliklarga qanday foyda keltirishini muhokama qiladi. G‘azodagi azob-uqubatlarni yengillashtirish, insonparvarlik yordamini keskin ko‘paytirish va falastinliklarning o‘z mahallalariga qaytishiga imkon berish masalalari ko‘rib chiqiladi.
“Safar Isroilning shimoliy chegarasida osoyishtalikka erishish imkoniyatini ochadi. Isroillik va livanlik oilalar o‘z uylariga qaytishlari mumkin bo‘ladi. Isroil va uning arab qo‘shnilari o‘rtasida yanada integratsiyalashuv, Isroilning uzoq muddatli xavfsizligini mustahkamlash va barqarorlikni yaxshilash uchun shart-sharoit yaratadi. Saʼy-harakatlarimiz mintaqa bo‘ylab mojaroning yanada kuchayishiga yo‘l qo‘ymaslik zarurligini yana bir bor taʼkidlaydi”, — degan Metyu Miller.
AQSH rasmiylari Blinken “Hizbulloh” va “Ansorulloh” vakillari bilan uchrashishi yoki uchinchi tomon orqali ularga xabar yo‘llab, hujumlarni to‘xtatishni so‘rashi mumkinligi haqida maʼlum qilgan
Izoh (0)