O‘rta Yer dengizining Liviya qirg‘oqlari yaqinida 7-iyun kuni 160 nafardan ortiq muhojir qutqarib qolindi. Bu haqda “Chegara bilmas shifokorlar” tashkiloti tarqatgan xabarga asoslanib, Reuters maʼlumot berdi.
Manbada aytilishicha, Geo Barents qidiruv-qutqaruv kemasi muhojirlarni qutqarish uchun ikkita maxsus operatsiya tashil etgan. Buning oqibatida dastlab 146 nafar, keyin esa yana 20 nafar muhojir qutqarib olingan.
“Spotter” dengiz kuzatuv samolyoti dengizda 11 ta jasad suzib yurganini maʼlum qilgan. Ular maxsus qayiqlar yuborib suvdan chiqarib olingan.
“Biz bu fojianing aniq sababini bilmaymiz, lekin odamlar xavfsizlikka erishish uchun umidsiz urinish ortidan ergashib, o‘lishda davom etayotganidan xabardormiz. Bu fojialar tugashi kerak”, — deyilgan “Chegara bilmas shifokorlar” tashkiloti bayonotida.
Dengizda jasadlarni ilk bor payqagan Sea Watch guruhi marhumlarni olib ketish uchun Liviya qirg‘oq qo‘riqlash xizmati bilan bog‘lanishga harakat qilganligini maʼlum qilgan. Ammo Liviya dengiz xizmati ularning chaqiruvini javobsiz qoldirgan.
Birlashgan Millatlar Tashkiloti 2014-yildan beri O‘rta Yer dengizining markaziy qismida 20 000 dan ortiq muhojir bedarak yo‘qolganini qayd etgan. Hozirda dengiz Shimoliy Afrikadan Yevropaga o‘tuvchi muhojirlar uchun dunyodagi eng xavfli nuqtaga aylangan.
Xabarda aytilishicha, qutqarilgan 160 dan ortiq muhojir Geo Barents kemasi bilan shimoliy Genuya portiga olib ketilgan. Ular keyinchalik Sitsiliyaga yuborilishi xabar qilingan.
Izoh (0)