Ukraina kuchlari 7-iyun kuni Lugansk va Xerson viloyatlaridagi Rossiya pozitsiyalariga hujum uyushtirishi oqibatida 26 kishi halok bo‘lgan. Bu haqda The Moscow Times nashri xabar berdi.
Hujumlar oqibatida asosan rus harbiylari halok bo‘lgan. O‘nlab yaradorlar mahalliy kasalxonalarga olib ketilgan.
Xerson viloyatida Rossiya hukumati tomonidan tayinlangan maʼmuriyat Ukraina hujumda HIMARS raketalaridan foydalanganini maʼlum qilgan. Raketalar harbiy inshootlar bilan birga fuqarolik binolariga ham zarar yetkazgan.
“Janubiy Xerson viloyatidagi Sadove qishlog‘ida ko‘p sonli tashrif buyuruvchilar va xodimlar bo‘lgan do‘kon vayron bo‘ldi”, — deya maʼlumot bergan Xersondagi Rossiya hokimiyati idorasi rahbari Vladimir Saldo.
Ukraina hujumi Lugansk viloyatida juma kuni tongda kuzatilgan. Viloyat markazidagi strategik nuqtalarga raketalar uchirilgan. Rossiya harbiy maʼmuriyati hujum oqibatida 4 kishi halok bo‘lgani va 40 dan ortiq odam yaralanganini eʼlon qilgan.
Rossiya vakillari juma kungi hujumda halok bo‘lganlarning to‘liq ro‘yxatini eʼlon qilmagan. Viloyatlar rahbariyatining asosan tinch aholi halok bo‘lgani haqidagi bayonoti uchun esa hozircha yetarli manba mavjud emas.
Moskva ,shuningdek, hujumga uchragan harbiy inshootlari haqida ham maʼlum qilmagan. Hujum oqibatida yetkazilgan zarar ko‘lami aniqlanayotgani bildirilgan.
Izoh (0)