O‘zbekiston Oliy Majlisi Senati raisi Tanzila Norboyeva Boku shahrida Ozarbayjon Milliy Mejlisi raisi Sahiba Gafarova bilan uchrashuv o‘tkazdi. Bu haqda Senat matbuot xizmati xabar berdi.
Uchrashuvda tomonlar parlamentlararo aloqalarni yanada rivojlantirish istiqbollarini muhokama qildi.
Xususan, yuqori darajadagi ikki tomonlama kelishuvlarning amalga oshirilishini taʼminlash, shu jumladan, parlamentlarning savdo-iqtisodiy, madaniy-gumanitar sohalardagi qo‘shma loyihalarni huquqiy jihatdan taʼminlashi masalalariga eʼtibor qaratildi.
2022-yilda parlamentlararo hamkorlikni rivojlantirish bo‘yicha Toshkentda imzolangan amaliy harakatlar rejasi, yaʼni “yo‘l xaritasi” ijrosi to‘liq taʼminlangani alohida qayd etildi.
Uchrashuv yakunida parlamentlar o‘rtasidagi hamkorlikni yanada yuqori bosqichga ko‘tarishga qaratilgan 2024–2025-yillarga mo‘ljallangan yangi “Yo‘l xaritasi” imzolandi.
Ushbu hujjat parlament aʼzolari o‘rtasida tashrif almashish orqali o‘zaro munosabatlarni chuqurlashtirish, qonun ijodkorligi faoliyatini rivojlantirishni ko‘zda tutadi. Shuningdek, undan ilm-fan, taʼlim, sog‘liqni saqlash, turizm, ekologiya, madaniyatlararo muloqotni rivojlantirish bo‘yicha hamkorlikning huquqiy asoslarini takomillashtirish kabi yo‘nalishlar ham o‘rin olgan.
Izoh (0)