“Bolalarga qanchalik bilim bersak, qo‘llab-quvvatlab, o‘zlari orzu qilgan inson qilib yetishtirsak, bu davlatga ham, o‘ziga ham foyda” — Tanzila Norboyeva

1-iyun — Xalqaro bolalarni himoya qilish kuni munosabati bilan oilaviy uylarni tashkil etgan oila va ota-ona qaramog‘idan mahrum bo‘lgan bolalari bilan birga Senatga tashrif buyurdi. Bu haqda yuqori palata axborot xizmati ma’lum qildi.

Senat raisi Tanzila Norboyevaning aytishicha, davlat tomonidan ko‘rsatilayotgan har qanday yordam va qo‘llovdan ham ko‘ra, har bir bola haqiqiy mehrni oilada, o‘z yaqin insonlaridan oladi.

“Mana shu bolalarga qanchalik mehrimizni bersak, qanchalik ularni salomat qilib o‘stirsak, qanchalik ularga bilim bersak, qo‘llab-quvvatlab, o‘zlari orzu qilgan inson qilib yetishtirsak, bu davlatga ham foyda, bolaning o‘ziga ham foyda. Shunda bola oyoqqa turib olib, mustahkam bo‘lib, hech kimdan kam emasman, deb hayotga kirib boradi”, — dedi Senat raisi.

Tanzila Norboyevaning alohida ta’kidlashicha, bolalarni uyiga qabul qilgan ota-onalar ularning iqtidoriga qarab to‘garak va musobaqalarga yo‘l qilib berishyapti.

Ko‘plab bolalarni asrab olgan tadbirkor Murod Nazarovning aytishicha, o‘zbek xalqi hech qachon bolalarni yolg‘iz qoldirmagan.

“Bolalarga ta’minotdan tashqari, mehr kerak, muhabbat kerak”, — dedi tadbirkor.