Samarqand viloyati IIB Jinoyat-qidiruv boshqarmasi Uyushgan jinoyatchilikka qarshi kurash bo‘limi xodimlari tomonidan fosh etilgan bir nechta tovlamachilik jinoyatlari haqida ma’lumot berdi.
Xususan, qo‘shrabotlik 30 yoshli erkak hali turmushga chiqmagan 20 yoshlardagi qiz bilan yaqin munosabatda bo‘lgan. O‘sha vaziyatni g‘arazli niyatda videotasvirga olgan va oradan vaqt o‘tib, munosabatlar yomonlashgani sababli ushbu tasvirlarni tarqatish bilan qo‘rqitib, undan tovlamachilik yo‘li bilan dastlab 800 ming so‘m pul hamda yangi qo‘l telefoni olgan.
Keyinchalik o‘sha shaxs qizdan yana tovlamachilik yo‘li bilan 1000 dollar pul talab qilgan. Holat yuzasidan 14-may kuni Samarqand shahar Rudakiy ko‘chasida o‘tkazilgan tezkor tadbirda erkak 1 million 200 ming so‘m pulni qizdan olayotganida daliliy ashyolar bilan ushlangan.
Navbatdagi tadbirda ham tovlamachilik qilganlar qo‘lga tushgan. Bir tashkilotda ishlovchi bo‘lim boshlig‘i kotibasi bilan ishqiy munosabatda bo‘lib kelgan. May oyida ikkalasi bir manzilda uchrashayotgan vaqtda kotibaning boshqa sevgilisi holat ustiga kelib qolgan va ularni videotasvirga olgan. 10 ming dollar bermasa, tasvirlarni tarqatish bilan qo‘rqitgan.
Tovlamachilar dastlab 3 ming dollarni qo‘lga kiritadi va qolganini ham tezroq berishini talab qiladi. 20-may kuni Samarqand shahar Bedil ko‘chasida o‘tkazilgan tezkor tadbir davomida arizachidan ushbu ayol va erkak tovlamachilik yo‘li bilan 4 ming dollar pulni olayotgan vaqtida ashyoviy dalillar bilan qo‘lga olingan.
Yana bir holatda 33 yoshli erkak turmushidan ajrashgan 37 yoshlardagi ayol bilan ishqiy munosabatlarda bo‘lib kelgan. O‘sha jarayonlarni g‘arazli niyatlarda videotasvirga tushirgan va ijtimoiy tarmoqlarda tarqatish bilan qo‘rqitib, dastlab undan tovlamachilik yo‘li bilan 3,5 ming dollar miqdorida pul olgan.
So‘ng jinoiy faoliyatini davom ettirib, tasvirlarni ijtimoiy tarmoqlarga joylashtirgan va bu fotosuratlarni o‘chirish evaziga yana 10 ming dollar pul talab qilgan.
25-may kuni Samarqand tumani Badal qishlog‘ida o‘tkazilgan tezkor tadbir davomida tovlamachi arizachidan 7,5 ming dollar hamda 2 ming yevro miqdoridagi pullarni olayotganida daliliy ashyolar bilan qo‘lga olingan.
Qayd etilishicha, mazkur holatlarning barchasi hujjatlashtirilgan va jinoyat sodir etgan shaxslar tegishli tartibda qamoqqa olingan. Hozirda tergov harakatlari olib borilmoqda.
Izoh (0)