Самарқандда раҳбар ва котибанинг ишқий муносабатидан 10 минг доллар ишлаб олмоқчи бўлган шахс қамоққа олинди

Самарқанд вилояти ИИБ Жиноят-қидирув бошқармаси Уюшган жиноятчиликка қарши кураш бўлими ходимлари томонидан фош этилган бир нечта товламачилик жиноятлари ҳақида маълумот берди.

Хусусан, қўшработлик 30 ёшли эркак ҳали турмушга чиқмаган 20 ёшлардаги қиз билан яқин муносабатда бўлган. Ўша вазиятни ғаразли ниятда видеотасвирга олган ва орадан вақт ўтиб, муносабатлар ёмонлашгани сабабли ушбу тасвирларни тарқатиш билан қўрқитиб, ундан товламачилик йўли билан дастлаб 800 минг сўм пул ҳамда янги қўл телефони олган.

Кейинчалик ўша шахс қиздан яна товламачилик йўли билан 1000 доллар пул талаб қилган. Ҳолат юзасидан 14 май куни Самарқанд шаҳар Рудакий кўчасида ўтказилган тезкор тадбирда эркак 1 миллион 200 минг сўм пулни қиздан олаётганида далилий ашёлар билан ушланган.

Навбатдаги тадбирда ҳам товламачилик қилганлар қўлга тушган. Бир ташкилотда ишловчи бўлим бошлиғи котибаси билан ишқий муносабатда бўлиб келган. Май ойида иккаласи бир манзилда учрашаётган вақтда котибанинг бошқа севгилиси ҳолат устига келиб қолган ва уларни видеотасвирга олган. 10 минг доллар бермаса, тасвирларни тарқатиш билан қўрқитган.

Товламачилар дастлаб 3 минг долларни қўлга киритади ва қолганини ҳам тезроқ беришини талаб қилади. 20 май куни Самарқанд шаҳар Бедил кўчасида ўтказилган тезкор тадбир давомида аризачидан ушбу аёл ва эркак товламачилик йўли билан 4 минг доллар пулни олаётган вақтида ашёвий далиллар билан қўлга олинган.

Яна бир ҳолатда 33 ёшли эркак турмушидан ажрашган 37 ёшлардаги аёл билан ишқий муносабатларда бўлиб келган. Ўша жараёнларни ғаразли ниятларда видеотасвирга туширган ва ижтимоий тармоқларда тарқатиш билан қўрқитиб, дастлаб ундан товламачилик йўли билан 3,5 минг доллар миқдорида пул олган.

Сўнг жиноий фаолиятини давом эттириб, тасвирларни ижтимоий тармоқларга жойлаштирган ва бу фотосуратларни ўчириш эвазига яна 10 минг доллар пул талаб қилган.

25 май куни Самарқанд тумани Бадал қишлоғида ўтказилган тезкор тадбир давомида товламачи аризачидан 7,5 минг доллар ҳамда 2 минг евро миқдоридаги пулларни олаётганида далилий ашёлар билан қўлга олинган.

Қайд этилишича, мазкур ҳолатларнинг барчаси ҳужжатлаштирилган ва жиноят содир этган шахслар тегишли тартибда қамоққа олинган. Ҳозирда тергов ҳаракатлари олиб борилмоқда.