Toshkentda “sevgan” qizidan tovlamachilik orqali pul undirib kelgan yigit javobgarlikka tortildi. Bu haqda “Zamon” informatsion dasturida ma’lum qilindi.
Qizning so‘zlariga ko‘ra, yigit boshida yaxshi ko‘raman deya uni ishontirgan. Keyinchalik qizning yalang‘och videolarini so‘ragan, tashlab bergach esa uni qo‘rqitishni boshlagan. “Sevishganlar” urishib qolgach, yigit telefonidagi yalang‘och videolarni tarqatish bilan qo‘rqitib, pul talab qilgan. Bu ish qo‘lidan kelishini isbotlash maqsadida qizning yaqinlariga videolarni ham tashlab bergan.
“Birinchi 2 million, keyin 4 million, ikki marta 1 million so‘mdan berganman”, — deydi jabrlanuvchi.
Sudlanuvchining aytishicha, u qizdan 8 million so‘m talab qilgan va pullarning barchasini olgan. Yigit umumiy hisobda 20 million so‘m xarajat qilganini bildirgan.
Bir necha marta pul bergan qiz, boshqa pul topa olmagach yigit ustidan huquqni muhofaza qiluvchi organlarga murojaat qilgan.
Sud hukmiga ko‘ra, sudlanuvchi Jinoyat kodeksining 165-modda (tovlamachilik) 2-qismi, 141-3-modda (shaxsning sha’nini va qadr-qimmatini kamsituvchi hamda inson hayotining sir tutiladigan tomonlarini aks ettiruvchi ma’lumotlarni oshkor qilish) 1-qismi bilan aybdor deb topildi va 5 yil-u 3 oyga ozodlikdan mahrum qilish jazosi tayinlandi.
O‘zgalarning shaxsiy ma’lumotlarini tarqatish orqali pul undirish holatlari
- Iyul oxirlarida Buxoro shahrida erkak bilan ishqiy munosabatda bo‘lib, uni turmush o‘rtog‘iga oshkor qilmaslik evaziga telefon talab qilgan qiz qo‘lga olingandi.
- May oyida Toshkentda ayolning foto-videolarini eri va qaynotasiga ko‘rsatishini aytib, undan pul talab qilgan erkak ushlangani,
- Toshkent viloyatida 19 yoshli qizning suratlarini tarqatish bilan tahdid qilgan yigit qo‘lga tushgani to‘g‘risida xabar berilgandi.
Izoh (0)