Rossiya hukumati Burkina-Fasodagi harbiy mutaxassislari sonini ko‘paytiradi. Bu haqda Rossiya tashqi ishlar vaziri Sergey Lavrov bayonotiga asoslanib, The Moscow Times nashri xabar berdi.
Rossiya tashqi ishlar vaziri Sergey Lavrov ushbu bayonotni 5-iyun kuni Burkina-Fasoga mintaqaviy safari doirasida maʼlum qilgan. U, shuningdek, harbiy hamkorlik yangi formatda davom etishini aytgan.
“Bu yerda rossiyalik harbiy mutaxassislar ishlamoqda. Ularning soni yana ko‘payadi. Shu bilan birga, biz Rossiyada Burkina-Faso qurolli kuchlari va xavfsizlik xizmati vakillarini qayta tayyorgarlikdan o‘tkazyapmiz”, — degan Lavrov poytaxt Uagaduguda o‘tkazilgan matbuot anjumanida.
Manbada aytilishicha, 2022-yil fevralida Ukrainaga keng miqyosli hujum ortidan G‘arb davlatlari bilan munosabatlari keskin yomonlashgan Moskva Afrika qitʼasi bo‘ylab o‘z taʼsirini kuchaytirishga harakat qilmoqda. Hozirda faqat ushbu mamlakatlarda harbiylarni qayta tayyorlashga diqqat-eʼtibor qaratilgan.
Sergey Lavrov 4-iyun kuni kechki payt Burkina-Fasoga yetib kelgan. Bu yerda u harbiy rejim rahbari, kapitan Ibrohim Traore bilan muzokara o‘tkazgan. Muzokara to‘liq tafsilotlari maʼlum emas.
Maʼlumot o‘rnida, 2022-yil sentyabrida yuz bergan to‘ntarish ortidan Burkina-Fasoda harbiy xunta hokimiyatga kelgan edi. Poytaxt Uagaduguda nazorat o‘rnatilgach Ibrohim Traore hukumati fransuz qo‘shinlari va diplomatlarini mamlakatdan chiqarib yuborgan.
Burkina-Fasoga harbiy intervensiya uyushtirilishi xavfi reallikka aylana boshlagach, hukumat Moskvadan harbiy yordam so‘ragan. Moskva bunga javoban harbiy mutaxassislar va kam sonli harbiy texnikalar jo‘natgan.
“Biz Burkina-Faso bilan uzoq vaqtdan beri aloqadamiz va prezident Traorening hokimiyatga kelishi bu munosabatlarga yangi ruh berdi”, — degan Sergey Lavrov.
Izoh (0)