Isroil fuqarolari 5-iyun kuni Quddus shahrining falastinliklar yashaydigan mahallalari bo‘ylab namoyish uyushtirdi. Bu haqda Al Jazeera nashri xabar berdi.
Manbada keltirilishicha, namoyishlar har yili o‘tkaziladigan “Quddus kuni” munosabati bilan tashkil etilgan. Unda minglab Isroil fuqarolari ishtirok etgan.
Yaqin Sharq nashrlari namoyishchilarning katta qismi o‘ta o‘ng millatchi isroilliklardan tashkil topganini yozgan. Ular Quddusning falastinliklar zich yashaydigan mahallalari bo‘ylab yurish qilgan. Olomon “Arablarga o‘lim”, “Yo‘qolsin arablar” kabi haqoratli so‘zlar yozilgan varaqalar ko‘tarib olgan.
Ushbu holat Quddus atrofida keskin vaziyat yuzaga keltirgan. Mahalliy falastinliklar va Isroil aholisi o‘rtasida kichik to‘qnashuvlar kuzatilgan.
Isroil aholisi 1967-yildan beri “Quddus kuni”ni nishonlab keladi. Uni o‘tkazishdan maqsad 1967-yilning yozida Isroil kuchlari tomonidan Sharqiy Quddus, jumladan uning Eski shahar qismi hamda yahudiylar, nasroniylar va musulmonlar uchun muqaddas bo‘lgan hududlar bosib olinganini nishonlash.
Falastinning WAFA agentligi isroilliklarning asosiy namoyishi Sharqiy Quddusdagi Damashq darvozasi oldida ro‘y berganini yozgan. Ushbu darvozaga musulmonlarga qarshi ruhdagi yuzlab shiorlar ilingan.
Izoh (0)