Россия ҳукумати Буркина-Фасодаги ҳарбий мутахассислари сонини кўпайтиради. Бу ҳақда Россия ташқи ишлар вазири Сергей Лавров баёнотига асосланиб, The Moscow Times нашри хабар берди.
Россия ташқи ишлар вазири Сергей Лавров ушбу баёнотни 5 июнь куни Буркина-Фасога минтақавий сафари доирасида маълум қилган. У, шунингдек, ҳарбий ҳамкорлик янги форматда давом этишини айтган.
“Бу ерда россиялик ҳарбий мутахассислар ишламоқда. Уларнинг сони яна кўпаяди. Шу билан бирга, биз Россияда Буркина-Фасо қуролли кучлари ва хавфсизлик хизмати вакилларини қайта тайёргарликдан ўтказяпмиз”, — деган Лавров пойтахт Уагадугуда ўтказилган матбуот анжуманида.
Манбада айтилишича, 2022 йил февралида Украинага кенг миқёсли ҳужум ортидан Ғарб давлатлари билан муносабатлари кескин ёмонлашган Москва Африка қитъаси бўйлаб ўз таъсирини кучайтиришга ҳаракат қилмоқда. Ҳозирда фақат ушбу мамлакатларда ҳарбийларни қайта тайёрлашга диққат-эътибор қаратилган.
Сергей Лавров 4 июнь куни кечки пайт Буркина-Фасога етиб келган. Бу ерда у ҳарбий режим раҳбари, капитан Иброҳим Траоре билан музокара ўтказган. Музокара тўлиқ тафсилотлари маълум эмас.
Маълумот ўрнида, 2022 йил сентябрида юз берган тўнтариш ортидан Буркина-Фасода ҳарбий хунта ҳокимиятга келган эди. Пойтахт Уагадугуда назорат ўрнатилгач Иброҳим Траоре ҳукумати француз қўшинлари ва дипломатларини мамлакатдан чиқариб юборган.
Буркина-Фасога ҳарбий интервенсия уюштирилиши хавфи реалликка айлана бошлагач, ҳукумат Москвадан ҳарбий ёрдам сўраган. Москва бунга жавобан ҳарбий мутахассислар ва кам сонли ҳарбий техникалар жўнатган.
“Биз Буркина-Фасо билан узоқ вақтдан бери алоқадамиз ва президент Траоренинг ҳокимиятга келиши бу муносабатларга янги руҳ берди”, — деган Сергей Лавров.
Изоҳ (0)