Burkina-Faso hukumati 3 nafar fransuz diplomatini mamlakatdan chiqarib yuborish to‘g‘risida qaror chiqardi. Bu haqda Anadolu nashri xabar berdi.
Manbada aytilishicha, fransuz diplomatlari persona non grata deb eʼlon qilingan. Endilikda ular mamlakatga qaytib kira olishmaydi.
Rasmiy hukumat Fransiya vakillarini “qo‘poruvchilik faoliyati bilan shug‘ullanish”da ayblagan. Ularga mamlakatdan chiqib ketish uchun 48 soat berilgan.
O‘tgan yili Burkina-Faso harbiy xuntasi ikki tomonlama aloqalar yomonlashuvi ortidan Fransiya elchisi Lyuk Xalladni mamlakatdan haydab chiqargan edi. Josuslikda ayblangan ikki fransuz fuqarosi ham fransuzlarga qarshi kayfiyat kuchaygani sababli mamlakatdan chiqarib yuborilgan edi.
2023-yilda Fransiyaning Uagadugudagi elchixonasi Fransiyaning Burkina-Fasodan chiqib ketishini talab qilgan namoyishchilar tomonidan ikki marta hujumga uchragan edi. Hukumat aholi talablarini inobatga olib siyosat yuritishga vaʼda bergan.
Maʼlumot o‘rnida, dengizga chiqish imkoni bo‘lmagan Burkina-Fasoda 2022-yilda ikkita davlat to‘ntarishi yuz bergan edi. Dastlab 2022-yil yanvar oyida harbiylar isyon ko‘tarib, saylangan prezident Roch Mark Kaborni hukumatdan olib tashlagan. 2022-yil sentyabrida esa kapitan Ibrohim Traore boshchiligida navbatdagi harbiy isyon sodir bo‘ldi. Harbiylar podpolkovnik Pol-Anri Sandaogo Damibani hukumatdan chetlatib, harbiy xunta eʼlon qildi.
Izoh (0)