“Арабларга ўлим” — Исроил фуқаролари Қуддусда Фаластинга қарши намойиш ўтказди

Исроил фуқаролари 5 июнь куни Қуддус шаҳрининг фаластинликлар яшайдиган маҳаллалари бўйлаб намойиш уюштирди. Бу ҳақда Al Jazeera нашри хабар берди.

Манбада келтирилишича, намойишлар ҳар йили ўтказиладиган “Қуддус куни” муносабати билан ташкил этилган. Унда минглаб Исроил фуқаролари иштирок этган.

Яқин Шарқ нашрлари намойишчиларнинг катта қисми ўта ўнг миллатчи исроилликлардан ташкил топганини ёзган. Улар Қуддуснинг фаластинликлар зич яшайдиган маҳаллалари бўйлаб юриш қилган. Оломон “Арабларга ўлим”, “Йўқолсин араблар” каби ҳақоратли сўзлар ёзилган варақалар кўтариб олган.

Ушбу ҳолат Қуддус атрофида кескин вазият юзага келтирган. Маҳаллий фаластинликлар ва Исроил аҳолиси ўртасида кичик тўқнашувлар кузатилган.

Исроил аҳолиси 1967 йилдан бери “Қуддус куни”ни нишонлаб келади. Уни ўтказишдан мақсад 1967 йилнинг ёзида Исроил кучлари томонидан Шарқий Қуддус, жумладан унинг Эски шаҳар қисми ҳамда яҳудийлар, насронийлар ва мусулмонлар учун муқаддас бўлган ҳудудлар босиб олинганини нишонлаш.

Фаластиннинг WAFA агентлиги исроилликларнинг асосий намойиши Шарқий Қуддусдаги Дамашқ дарвозаси олдида рўй берганини ёзган. Ушбу дарвозага мусулмонларга қарши руҳдаги юзлаб шиорлар илинган.