AQSH Kongressining Vakillar palatasi Xalqaro jinoiy sud (XJS) faoliyatiga cheklovlar qo‘yuvchi qonun loyihasini ma’qulladi.
Qonun loyihasi uchun 247 nafar kongressmen ovoz bergan: 205 nafar respublikachi va 42 nafar demokrat. 155 nafar demokratlar bunga qarshi chiqqan. Hujjat Senatda ma’qullansa va AQSH prezidenti Jo Bayden tomonidan imzolansagina qonuniy kuchga ega bo‘ladi.
Avvalroq Oq uy matbuot kotibi Karin Jan-Pyer prezident ma’muriyati ushbu qonun loyihasiga qarshi ekanligini va Isroilni qo‘llab-quvvatlashning boshqa usullarini ko‘rishini aytgan.
Vakillar palatasidagi respublikachilar amerikaliklar va ittifoqdosh mamlakatlardan kelgan shaxslarga qarshi tergov olib boradigan XJS xodimlarining Qo‘shma Shtatlarda ko‘chmas mulk bilan bog‘liq har qanday operatsiyalarini taqiqlashni, shuningdek, Amerika vizalarini berishni cheklash niyatida. Ushbu cheklashlar sanksiya qo‘yilgan shaxslarning qarindoshlariga ham tegishli bo‘lishi mumkin.
Avvalroq XJS prokurori Karim Xon Isroil bosh vaziri Binyamin Netanyaxu va mamlakat mudofaa vaziri Yoav Galantni hibsga olish uchun order berishni talab qilgan edi. Shu munosabat bilan ko‘plab amerikalik siyosatchilar, xususan, respublikachilar XJS faoliyatini cheklashga chaqirgan.
Izoh (0)