Toshkent viloyati Olmaliq shahrida qiz o‘zini 16 qavatli “dom” tomidan tashlab yuborgani haqida xabar berilgandi. Viloyat hokimligi bu bo‘yicha maʼlumot berdi.
Maʼlum bo‘lishicha, 2024-yil 4-iyun kuni soat 16:45 da shahar IIBga “Uvaysiy” MFYdagi ko‘p qavatli 45-uyning tom qismidan o‘z joniga qasd qilmoqchi bo‘layotgan qizni qutqarish lozimligi haqida xabar kelib tushgan.
Shahar IIB va FVB vakillari hamda MFY raisi zudlik bilan voqea joyiga yetib kelgan va qiz bilan suhbatlashilgan. Ammo olib borilgan muzokaralarga qaramasdan, qiz o‘z joniga qasd qilgan. Mahalla raisi va shu ko‘p qavatli uy aholisining aytishicha, bu qiz ushbu ko‘p qavatli uyda yashamagan.
Hozirda shahar IIB tomonidan marhum qizning shaxsiga aniqlik kiritish ishlari olib borilmoqda.
Joniga qasd qilgan qizlar
Avvalroq Toshkent shahar Yangihayot tumanida 17 yoshli qiz o‘z joniga qasd qilgani haqida xabar qilingandi. 2006-yilda tug‘ilgan voyaga yetmagan qiz (Turkiya fuqarosi) noma’lum sabablarga ko‘ra, 6-qavatdan o‘zini tashlagan. Olgan tan jarohatlari oqibatida u shifoxonada vafot etgan.
Shuningdek, Farg‘ona viloyatining Buvayda tumanida 16 yoshli qiz o‘zini osib qo‘ygandi. Marhumaning yaqin qarindoshlari so‘nggi vaqtlarda uning ruhiyati buzilib qolgani, o‘z joniga qasd qilishida hech kimning aybi yo‘qligini izohlab, tushuntirish bergan.
Bundan tashqari, Jizzax viloyati Sharof Rashidov tumanida 18 yoshli qiz yuqori qavatdan o‘zini tashlab, joniga qasd qilgan. Voqea guvohi bo‘lgan ayolning so‘zlariga ko‘ra, marhuma o‘zini tashlashidan oldin ushbu uylar atrofiga bir necha marotaba kelib ketgan.
Izoh (0)