Shavkat Mirziyoyev 4-iyun kuni O‘zbekiston-Saudiya Ishbilarmonlar kengashi hamraisi, ACWA Power kompaniyasi boshqaruvi raisi Muhammad Abunayyanni qabul qildi. Bu haqda Prezident matbuot xizmati xabar berdi.
Saudiya Arabistoni yetakchi kompaniyalari bilan amaliy hamkorlikni yanada kengaytirish, qo‘shma investitsiya loyihalarini amalga oshirish masalalari ko‘rib chiqildi.
Davlat rahbari ACWA Power bilan samarali sheriklik yuksak darajaga chiqqanini mamnuniyat bilan taʼkidladi.
Kompaniyaning mamlakat energetika bozorini rivojlantirishdagi yetakchi o‘rni qayd etildi. Bugungi kunda joriy va istiqbolli qo‘shma loyihalar portfeli 17 milliard dollardan oshdi.
Ishbilarmonlar kengashi faoliyati doirasida Saudiyadan yangi kompaniyalarni O‘zbekistonga jalb qilish ishlarini davom ettirish muhimligi taʼkidlandi.
Aeroportlarni qurish va boshqarish, raqamli va energetika infratuzilmasini modernizatsiya qilish, issiqlik taʼminoti tarmoqlarini kengaytirish, chiqindilarni qayta ishlash, farmatsevtika mahsulotlarini ishlab chiqarish, onkologiya klinikalarini ochish, turizm markazi, to‘qimachilik klasterini tashkil etish, issiqxona xo‘jaligi va chorvachilikni rivojlantirish kabi qo‘shma loyihalarni amalga oshirishni jadallashtirish masalalariga alohida eʼtibor qaratildi.
Izoh (0)