Шавкат Мирзиёев 4 июнь куни Ўзбекистон-Саудия Ишбилармонлар кенгаши ҳамраиси, АCWА Power компанияси бошқаруви раиси Муҳаммад Абунайянни қабул қилди. Бу ҳақда Президент матбуот хизмати хабар берди.
Саудия Арабистони етакчи компаниялари билан амалий ҳамкорликни янада кенгайтириш, қўшма инвестиция лойиҳаларини амалга ошириш масалалари кўриб чиқилди.
Давлат раҳбари АCWА Power билан самарали шериклик юксак даражага чиққанини мамнуният билан таъкидлади.
Компаниянинг мамлакат энергетика бозорини ривожлантиришдаги етакчи ўрни қайд этилди. Бугунги кунда жорий ва истиқболли қўшма лойиҳалар портфели 17 миллиард доллардан ошди.
Ишбилармонлар кенгаши фаолияти доирасида Саудиядан янги компанияларни Ўзбекистонга жалб қилиш ишларини давом эттириш муҳимлиги таъкидланди.
Аэропортларни қуриш ва бошқариш, рақамли ва энергетика инфратузилмасини модернизация қилиш, иссиқлик таъминоти тармоқларини кенгайтириш, чиқиндиларни қайта ишлаш, фармацевтика маҳсулотларини ишлаб чиқариш, онкология клиникаларини очиш, туризм маркази, тўқимачилик кластерини ташкил этиш, иссиқхона хўжалиги ва чорвачиликни ривожлантириш каби қўшма лойиҳаларни амалга оширишни жадаллаштириш масалаларига алоҳида эътибор қаратилди.
Изоҳ (0)