Afg‘onistonning Shibirg‘on shahrida Qo‘shtepa kanali loyihasining ikki muhandisi hujumga uchrashi oqibatida halok bo‘ldi. Bu haqda manbalarga tayanib, Etilaatroz xabar berdi.
Ma’lum qilinishicha, ikki muhandis Saxiobod tumanidagi yashash joylarida noma’lum shaxslar tomonidan o‘qqa tutilgan. Marhumlar Milliy taraqqiyot kompaniyasi xodimlari bo‘lib, Qo‘shtepa kanali loyihasida ishlagan. Manba halok bo‘lganlarning shaxsi haqida batafsil ma’lumot bermagan. Hozircha hujumning maqsadi va ijrochilari aniq emas. Juzjondagi “Tolibon” xavfsizlik xizmati rasmiylari hodisaga izoh bermagan.
Qo‘shtepa “Tolibon”ning yirik loyihasi
Qo‘shtepa kanali loyihasi Amudaryoning suv resurslarini boshqarish sohasidagi yirik loyihalardan biridir, u hozirda Afg‘oniston shimolida amalga oshirilmoqda. “Tolibon” kanalning birinchi bosqichi ishga tushirilganini aytmoqda, ammo Markaziy Osiyo davlatlari bu loyihadan xavotirda.
The Economist prognoziga ko‘ra, agar kanal qurib bitkazilsa, mintaqaviy mojaroning kuchayishiga olib kelishi mumkin. Kanal Amudaryo suvini O‘zbekiston bilan chegaraga yo‘naltiradi. Afg‘oniston elektr energiyasining katta qismini O‘zbekistondan import qilishi hisobga olinsa, “Tolibon” qo‘shni respublikaga qarshi chiqolmaydi.
“Iqlim o‘zgarishi O‘zbekistonni 15 foiz suv yo‘qotishiga sabab bo‘lmoqda, agar kanal qurilishi ortidan yana 10 foiz yo‘qotsa, O‘zbekiston 25 foiz suv yo‘qotishi mumkin”, — deyiladi yana bir prognozda.
O‘zbekiston prezidenti Shavkat Mirziyoyev “Tolibon” tomonidan Qo‘shtepa kanali qurilishi Markaziy Osiyodagi suv rejimi va muvozanatini o‘zgartirishini aytgandi. “Tolibon” esa O‘zbekiston Qo‘shtepa kanalidan zarar ko‘rmasligiga va’da bergan.
Izoh (0)