Isroil harbiylari HAMAS tomonidan garovga olingan to‘rt kishi G‘azoda vafot etganini ma’lum qildi. Bu haqda Euronews xabar berdi.
Qurbonlar orasida uch nafar keksa erkak, jumladan, Yoram Metsger (80 yosh), Amiram Kuper (80 yosh) va Xaim Peri (79 yosh) bor. Ularning barchasi 2023-yil 7-oktyabrda HAMAS tomonidan o‘g‘irlab ketilgan. To‘rtinchi vafot etgan garovdagi erkak 51 yoshli Nadav Popplevel ekani ma’lum bo‘lgan.
“To‘rt nafar garovga olingan shaxsni o‘lgan deb e’lon qilish haqidagi qaror razvedka ma’lumotlariga asoslanadi. Isroilning Din ishlari vazirligi va bosh ravvinlari bilan kelishilgan holda ularning o‘limi Sog‘liqni saqlash vazirligining ekspert komissiyasi tomonidan tasdiqlangan”, — deyiladi xabarda.
Ta’kidlanishicha, vafot etganlar jasadlari HAMAS qo‘lida saqlanmoqda. Isroil armiyasi ular qanday sharoitda o‘lganini aniqlamoqda. Yahudiy davlati armiyasi matbuot kotibi kontr-admiral Daniel Hagarining aytishicha, to‘rt kishi G‘azo janubidagi Xon Yunis shahrida Isroil operatsiya o‘tkazayotgan vaqtda birga halok bo‘lgan.
“Biz barcha ehtimoliy variantlarni tekshirmoqdamiz. Ko‘p savollar bor”, — dedi Hagariy.
HAMAS may oyida Popplevel Isroil havo hujumida yaralanganidan keyin vafot etganini aytgandi. Ular 7-oktyabr kuni Isroilga hujum qilib, u yerdan 250 ga yaqin odamni garovga olgandi. Ularning yarmiga yaqini noyabr oyidagi qisqa muddatli sulh chog‘ida qo‘yib yuborilgan. G‘azoda qolgan 130 nafar garovga olinganlardan 85 nafari tirik ekani taxmin qilinmoqda.
Izoh (0)