Ijtimoiy tarmoqlardagi ba’zi kanallarda 20 tonna pomidor Rossiyadan O‘zbekistonga qaytarilgani to‘g‘risida xabarlar tarqaldi. Qishloq xo‘jaligi vazirligi holatga izoh berdi.
Rossiyaning Sverdlovsk viloyatidagi Yekaterinburg shahrida joylashgan vaqtinchalik omborda saqlanayotgan 20 tonna pomidor mahsulotida pomidor jigarrang bujmayish virusi (Tomato brown rugose fruit virus) aniqlangani tufayli mahsulot O‘zbekistonga qaytarilayotgani ma’lum qilingan.
Qishloq xo‘jaligi vazirligiga ko‘ra, ayni paytda vazirlik huzuridagi O‘simliklar karantini va himoyasi agentligi mutasaddilari hamda Rossiyadagi mas’ul tashkilotlar holat yuzasidan pomidor mahsulotlarining ekspertizasini olib bormoqda. Shuningdek, fitosanitariya sertifikatlari ham tekshiruvdan o‘tkazilmoqda.
“Pomidor jigarrang bujmayish virusi kasalligi” respublika hududlarida tarqalishiga qarshi choralar
O‘zbekistonda 2023-yilning 1 yarim yilligida pomidor va qalampir mahsulotlarining yangi “Pomidor jigarrang bujmayish virusi kasalligi” respublika hududlarida tarqalishiga qarshi choralar ko‘rilib, eksportga qo‘yilgan cheklovlar bartaraf qilinishiga erishildi. Fitosanitar talablarga javob bermagani sababli 14 ta davlatga 143 ta e’tiroznoma (notifikatsiya) yuborildi. 9 000 dona zararlangan import mahsulotlari eksportyor davlatlarga qaytarildi.
Bu qanday virus?
Ma’lumot uchun jigarrang bujmayish virusi o‘simliklarda uchraydigan kasalliklardan biridir, xususan pomidor o‘simliklarida ko‘proq kuzatiladi. Bu kasallikning alomatlariga mozaika singari barglarning rang-parang bo‘lishi, o‘simliklarning rivojlanishida sekinlashish va mevalarning buzilishini sanab o‘tish mumkin.
Kasallikning darajasi pomidor navlariga qarab yengil yoki og‘ir bo‘lishi mumkin. Virus kasalliklari bilan kurashish o‘simlikni qo‘ziqorinlar va zararkunandalar hujumidan himoyalash, sho‘rlanish yoki haddan tashqari suv berishdan saqlanish va kasallangan o‘simlik qismlarini o‘z vaqtida yo‘q qilish kabi agrotexnik chora-tadbirlarni o‘z ichiga oladi.
Izoh (0)