Qirg‘iziston prezidenti Sadir Japarov voyaga yetmaganlarga nisbatan jinsiy zo‘ravonlik uchun jazoni kuchaytiruvchi qonunni imzoladi. Endilikda 60 yoshdan oshgan fuqarolar ham bunday jinoyatlar uchun umrbod qamoq jazosiga hukm qilinadi. Bu haqda prezident matbuot xizmati xabar berdi.
Jinoyat va Jinoyat-protsessual kodekslariga kiritilgan o‘zgartirishlar jinoyat sodir etgan paytda 60 yoshga to‘lgan erkaklarni umrbod ozodlikdan mahrum etishni nazarda tutadi. Gap “bolaning jinsiy daxlsizligi va jinsiy erkinligiga qarshi” jinoyat sodir etganlar haqida ketmoqda.
Ilgari Qirg‘iziston Jinoyat kodeksida umrbod ozodlikdan mahrum qilish jazosi quyidagilarga tayinlanmagandi:
- ayollar;
- 18 yoshga to‘lmagan jinoyat sodir etgan shaxslar;
- jinoyat sodir etgan paytda 60 yoshda bo‘lgan erkaklar.
Shuningdek, Jinoyat-protsessual kodeksiga bolaning jinsiy daxlsizligi va jinsiy erkinligiga qarshi jinoyatlar bo‘yicha sud tomonidan jazo tayinlanmasdan ayblov hukmi chiqarish imkoniyatini istisno qiluvchi o‘zgartirishlar kiritilgan.
O‘zgartirishlar parlament tomonidan 11-aprel kuni qabul qilingan. Qirg‘izistonda umrbod qamoq jazosi eng maksimal jazo turi hisoblanadi.
Izoh (0)