Checheniston rahbari Ramzan Qodirovning to‘ng‘ich o‘g‘li Axmat sport vaziri bo‘ldi. Bu haqda Qodirov o‘zining Telegram kanalida xabar berdi.
Axmat Qodirov 18 yoshda. Fevral oyidan buyon u yoshlar ishlari vaziri, ungacha jismoniy tarbiya va sport vazirining birinchi o‘rinbosari lavozimida ishlab kelgan. Ramzan Qodirov avvalgi sport vaziri Iso Ibrohimovni Checheniston rahbari va hukumati administratsiyasi rahbari o‘rinbosari etib tayinlagan.
Shuningdek, respublika hukumati tarkibiga yangi yoshlar ishlari vaziri – Ramzan Vismurodov (2022-yil fevraldan “Axmat” sport klubi direktori edi) va sanoat vaziri – Temirlan Xuchiyev (Achxoy-Martan tuman administratsiyasi boshlig‘i) qo‘shilgan.
Yuqori lavozimlarga ko‘rsatilganlarning har biri o‘ziga bildirilgan ishonchni to‘liq oqlashiga mutlaq ishonaman, — degan Checheniston rahbari.
Ramzan Qodirov va uning oilasi muntazam ravishda taqdirlanib, yuqori lavozimlarga tayinlanib keladi. BBC rus xizmatining 2018-yilda hisob-kitoblariga ko‘ra, Chechenistondagi 158 nafar yuqori martabali amaldorning 30 foizi respublika rahbarining qarindoshlari, 23 foizi qishloqdoshlari, yana 12 foizi Checheniston rahbarining do‘stlari va ularning qarindoshlaridir.
Qarindoshlarimning har qanday muassasa va har qanday lavozimdagi talabi o‘n barobar ko‘p, chunki ular menga qaramay ishlashini isbotlashi kerak. Kimga ishonsam, o‘shani tayinlayman, — degan edi Qodirov bu borada.
Izoh (0)