Чеченистон раҳбари Рамзан Қодировнинг тўнғич ўғли Ахмат спорт вазири бўлди. Бу ҳақда Қодиров ўзининг Telegram каналида хабар берди.
Ахмат Қодиров 18 ёшда. Февраль ойидан буён у ёшлар ишлари вазири, унгача жисмоний тарбия ва спорт вазирининг биринчи ўринбосари лавозимида ишлаб келган. Рамзан Қодиров аввалги спорт вазири Исо Иброҳимовни Чеченистон раҳбари ва ҳукумати администрацияси раҳбари ўринбосари этиб тайинлаган.
Шунингдек, республика ҳукумати таркибига янги ёшлар ишлари вазири – Рамзан Висмуродов (2022 йил февралдан “Ахмат” спорт клуби директори эди) ва саноат вазири – Темирлан Хучиев (Ачхой Мартан туман администрацияси бошлиғи) қўшилган.
Юқори лавозимларга кўрсатилганларнинг ҳар бири ўзига билдирилган ишончни тўлиқ оқлашига мутлақ ишонаман, — деган Чеченистон раҳбари.
Рамзан Қодиров ва унинг оиласи мунтазам равишда тақдирланиб, юқори лавозимларга тайинланиб келади. BBC рус хизматининг 2018 йилда ҳисоб-китобларига кўра, Чеченистондаги 158 нафар юқори мартабали амалдорнинг 30 фоизи республика раҳбарининг қариндошлари, 23 фоизи қишлоқдошлари, яна 12 фоизи Чеченистон раҳбарининг дўстлари ва уларнинг қариндошларидир.
Қариндошларимнинг ҳар қандай муассаса ва ҳар қандай лавозимдаги талаби ўн баробар кўп, чунки улар менга қарамай ишлашини исботлаши керак. Кимга ишонсам, ўшани тайинлайман, — деган эди Қодиров бу борада.
Изоҳ (0)