Ramzan Qodirov rasmiylardan aholining qarzlarini to‘lashni so‘radi

Checheniston rahbari Ramzan Qodirov amaldorlarni mahalliy aholining oziq-ovqat do‘konlarida to‘plangan qarzlarini o‘z zimmalariga olishga chaqirdi. Bu haqda u Telegram’dagi kanalida ma’lum qildi.

Qodirov hududni ijtimoiy-iqtisodiy rivojlantirish masalalariga bag‘ishlangan kengaytirilgan yig‘ilishda tegishli tashabbus bilan chiqdi.

Xadijatdan (Xadijat Qodirova — Checheniston rahbarining qizi, Checheniston rahbari va hukumati ma’muriyati boshlig‘ining o‘rinbosari) sms xabarnoma oldim, ko‘pchilik moliyaviy imkoniyati yo‘qligi sababli kreditga mahsulot sotib olishga majbur bo‘lmoqda. Ularni yopishga yordam bersak, hamma uchastka tanlab, qarzlarni uzsa yaxshi bo‘lardi. Men yashayotgan hududimdagi mavjud qarzlarni to‘layman, — dedi u.

Checheniston rasmiylari Qodirovning so‘zlarini olqishlar bilan kutib oldi.

“RIA Novosti”ning qayd etishicha, Chechenistonda mahalliy aholi tomonidan kichik do‘konlardan oziq-ovqat qarzga olish amaliyoti mavjud. Odamlar oziq-ovqatni, qoida tariqasida, hamma bir-birini taniydigan va ishonch darajasi yuqori bo‘lgan qo‘shni do‘konlardan oladi.