Checheniston rahbari Ramzan Qodirov mamlakatdagi barcha 309 nafar imomga Lada Granta avtomobillarini sovg‘a qildi. Bu haqda “Grozniy Inform” xabar berdi.
Xabarga ko‘ra, Rossiya qahramoni Axmat-Xadji Qodirov nomidagi jamoat fondi nomidan imomlarga mashina sovg‘a qilingan va pul tarqatilgan. Checheniston muftiysi Salah Mejiev pul mablag‘larini topshirgan. Xayriya aksiyasi Muhammad (s.a.v) payg‘ambarning meroj kechasi — Al-Isro val-Miroj sharafiga tashkil etilgan.
“Qodir Tangrining marhamati bilangina Checheniston respublikasi rahbari Ramzan Qodirov bunday xayrli ishni amalga oshirishi mumkin. U bir kunda respublikaning barcha 309 nafar imomiga mashina va 100 ming rubldan (1000 dollardan ortiq) berdi. Alloh taolo uni yaxshiliklari uchun yaxshilik bilan mukofotlasin. Bu, shubhasiz, misli ko‘rilmagan rag‘batlantirish”, — dedi Mejiyev.
Yangi avtomashina kalitlari va mablag‘lar har bir imomga shaxsan topshirilgan.
“Respublika rahbari Ramzan Axmatovich Qodirovga Qodir Tangri taolo tomonidan boshqalarda yo‘q ulkan saxiylik in’om etilgan. Bu barcha imomlar uchun juda yaxshi va quvonchli xabar bo‘ldi. Alloh Ramzan Axmatovichni har qanday balolardan o‘z panohida asrasin va uzoq yillik umr bersin! Alloh taolo ko‘rsatgan yordami uchun uni barakot bilan mukofotlasin”, — deya xulosa qildi Checheniston Respublikasi muftiysi.
Izoh (0)