Qashqadaryo va Sirdaryo viloyatlarida kredit mablag‘larini o‘zlashtirgan sobiq menejer hamda bank xizmatlari markazi rahbari aniqlandi. Bu haqda Bosh prokuratura huzuridagi departament xabar berdi.
Qayd etilishicha, departamentning Kasbi tumani bo‘limi tomonidan tergovga qadar tekshiruv o‘tkazilgan. Tekshiruvda fuqaro Y.SH. hududiy tijorat banki filiali bo‘limi bosh menejeri lavozimida ishlagan davrida fuqaro T.SH. bilan o‘zaro til biriktirib, 12 nafar fuqaro nomidan ularning xabardorligisiz kredit shartnomalarini rasmiylashtirib, jami 304,3 million so‘m kredit mablag‘larini olib o‘zlashtirgani aniqlangan.
Shu kabi, departamentning Yangiyer shahar bo‘limi tomonidan o‘tkazilgan tergovga qadar tekshiruvda hududiy tijorat banki Yangiyer shahar bank xizmatlari markazi sobiq rahbari I.B. va boshqalar fuqaro G‘.S.ga ajratilgan 390 million so‘m kredit mablag‘ini uning xabardorligisiz naqdlashtirib olib, shundan 260 million so‘mini G‘.S.ga berib, qolgan 130 million so‘mini o‘zlashtirgani aniqlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Farg‘ona viloyatining Qo‘qon shahrida 19 nafar fuqaro nomiga avtokredit rasmiylashtirib o‘zlashtirgan shaxslar aniqlangan edi. Shuningdek, Toshkent viloyatida o‘zini bank xodimi deb tanishtirib, o‘zganing nomiga kredit rasmiylashtirgan shaxs ushlangani to‘g‘risida xabar berilgandi.
Izoh (0)