Ўзбекистоннинг қатор ҳудудларида кредит маблағларини ўзлаштириш ҳолатлари аниқланди. Бу ҳақда Прокуратура департаменти хабар берди.
Унга кўра, ҳолатлардан бири Бош прокуратура ҳузуридаги департаментнинг Пахтачи туман бўлими томонидан ўтказилган терговга қадар текширувда аниқланган. “А.Э.” хусусий корхонаси раҳбари “Э.А.” пишиқ ғишт ишлаб чиқариш корхонасини ташкил этиш учун ажратилган 2,2 млрд сўм имтиёзли кредит эвазига харид қилинган ускуналарни сотиб юбориб кредит маблағларини талон-торож қилган.
Шунингдек ҳудудий тижорат банки филиали масъул шахслари “А.Э.” корхонаси томонидан ишлар тўлиқ бажарилмаган бўлса-да, ускуналарни гаров таъминоти сифатида олиб қўймагани аниқланган.
Шу каби департаментнинг Пахтакор туман бўлими томонидан ўтказилган терговга қадар текширувда “О.С.” ва “П.О.” МЧЖ масъул шахслари “П.О.” МЧЖга ёмғирлатиб суғориш технологиясини сотиб олиш учун тижорат банки филиалидан ажратилган кредит эвазига 849,9 млн сўмлик ишларни бажариб, 1,9 млрд сўм кредит маблағларини ўзлаштириш йўли билан талон-торож қилгани аниқланган.
Департаментнинг Қўнғирот туман бўлими томонидан ўтказилган терговга қадар текширувда “Ш-Ш.” корхонаси масъул шахслари ва бошқалар автомобилларга хизмат кўрсатиш ускуналари олиш учун ажратилган 1,4 млрд сўм кредит маблағини “М.Т.” МЧЖ ҳисоб рақамига ўтказилиб талон-торож қилгани, шунингдек, банк филиали масъул шахслари ажратилган кредит маблағининг мақсадли сарфланишини ва гаровга қўйилган мулкнинг сақланишини ўрганмаганликлари аниқланган.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 205-моддалари (ҳокимият ёки мансаб ваколатини суиистеъмол қилиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)