Rossiya prezidenti Vladimir Putinning so‘zlariga ko‘ra, Rossiya va Xitoy o‘rtasidagi munosabatlar opportunistik emas hamda hech kimga qarshi qaratilmagan. Bu haqda u XXR raisi Si Szinpin bilan tor doiradagi suhbat chog‘ida ma’lum qildi.
Putin Rossiya va XXR o‘rtasidagi hamkorlik hozirda xalqaro maydonda barqarorlashtiruvchi asosiy omillardan biri ekanini ta’kidlagan. Uning so‘zlariga ko‘ra, Rossiya va Xitoy ko‘p qutbli voqelik va xalqaro huquqqa asoslangan dunyo tartibini aks ettiruvchi adolat tamoyillari, demokratik dunyo tartibini birgalikda himoya qiladi.
Bundan tashqari, mamlakatlar BMT, BRIKS, SHHT va G20 doirasida muvaffaqiyatli hamkorlik qilmoqda. Rossiya va Xitoy Yevrosiyo makonida integratsiya jarayonlarini yanada uyg‘unlashtirish, YevroAzES va “Bir kamar, bir yo‘l” tashabbusini birlashtirish tarafdori, — deya qo‘shimcha qilgan Rossiya rahbari.
Putin Xitoyga davlat tashrifi ikki tomonlama hamkorlikning barcha sohalarini rivojlantirishga qo‘shimcha turtki berishiga umid bildirgan.
Rossiya prezidenti joriy yilda XXR tashkil topganiga va davlatlar o‘rtasida diplomatik munosabatlar o‘rnatilganiga 75 yil to‘lishini ta’kidlagan.
Avvalroq Si Szinpin Xitoy va Rossiya bloklarga qo‘shilish, qarama-qarshilik qilmaslik va munosabatlarni boshqa davlatlarga qarshi yo‘naltirmaslik tamoyillariga amal qilish niyatida ekanini aytgan edi. Uning fikricha, tomonlar o‘zaro siyosiy ishonchni mustahkamlaydi, tanlangan taraqqiyot yo‘lini hurmat qiladi va umumiy farovonlik yo‘lida bir-birini qo‘llab-quvvatlaydi.
Izoh (0)