G‘azo sektorida Isroil hujumlari oqibatida halok bo‘lganlar soni 16-may kuni 35 272 nafarga yetgan. Bu haqda G‘azo Sog‘liqni saqlash vazirligi bayonotiga asoslanib, Al Arabiya nashri xabar berdi.
Manbada aytilishicha, G‘azo sektorida 7 oy davom etgan janglar yana qaytadan kuchaya boshlagan. So‘nggi ikki hafta davomida halok bo‘lganlar soni keskin oshgan.
Hozirga qadar G‘azo sektorida hujumlar oqibatida yaralanganlarning umumiy soni 79 205 nafarga yetgan. Sog‘liqni saqlash tizimi muassasalari vayron etilgani bois jarohatlanganlar ochiq sharoitlarda yoki dala shifoxonalarida davolanayotgani bildirilgan.
Rasmiylar 7-oktyabrdan to hozirga qadar kamida 10 ming nafar g‘azolik bedarak yo‘qolganini bildirgan. Bir qator manbalar bedarak yo‘qolganlarning ko‘pchiligi halok bo‘lgan yoki Isroil mahbuslar lagerlariga tushib qolgan bo‘lishi mumkinligini bildirgan.
Isroilning so‘nggi hujumlari asosan G‘azo sektori shimolidagi Jabaliya va janubi-sharqdagi Xon Yunis hududlariga qaratilgan. Isroil havo kuchlari ushbu hududlarda asosan turar joy inshootlarini nishonga olgan.
Izoh (0)