Qozog‘iston Rossiyani chetlab o‘tib, uran eksporti yo‘nalishlarini diversifikatsiya qilish imkoniyatlarini o‘rganmoqda. Bu haqda Paluba Media xabar berdi.
Qozog‘istonning 2023-yilga mo‘ljallangan yoqilg‘i-energetika kompleksini rivojlantirish konsepsiyasini amalga oshirish to‘g‘risidagi hisobotiga ko‘ra, “Kazatomprom” Xitoyning CNUC, CNEIC va CNNC kompaniyalari bilan Xitoy orqali uran tranziti xizmatlarini ko‘rsatish bo‘yicha kelishuv ustida ishlamoqda.
Qozog‘iston hozirda uran mahsulotlarini Shimoliy Amerika va Yevropadagi iste’molchilarga Sankt-Peterburg porti orqali yetkazib beradi. Transkaspiy xalqaro transport marshrutidan Aktau (Qozog‘iston), Alyat (Ozarbayjon) va Poti (Gruziya) portlari orqali jo‘natishning alternativ usuli hisoblanadi.
2023-yilda Qozog‘istonda 21,112 ming tonna uran ishlab chiqarilgan, bu 2022-yilga nisbatan 1 foizga kam. “Kazatomprom” va uning sho‘ba korxonalari savdosi o‘tgan yili 10 foizga oshib, 18 069 ming tonnani tashkil etgan, bir funt uran konsentratining o‘rtacha sotish narxi 27 foizga oshib, 55,06 dollarni tashkil etgan.
Avvalroq “Kazatomprom” Rossiya hududi orqali mahsulotlarni eksport qilish Rossiya orqali tranzit bilan bog‘liq xavflarni keltirib chiqarishi, shuningdek, logistika cheklovlari import narxini oshirishi mumkinligi haqida xabar bergan edi. Kompaniya doimiy ravishda sanksiyalarning tayyor mahsulotni tashish qobiliyatiga ta’sirini kuzatib bormoqda.
Izoh (0)