Qozog‘istonning davlatga qarashli uran qazib chiqaruvchi korxonasi talab ortib borayotgani sababli ishlab chiqarish uchun zaxiralarni tayyorlamoqda. Sharqiy Yevropa esa bu borada Rossiyaga qaramligini kamaytirmoqchi. Bu haqda Bloomberg xabar berdi.
“Kazatomprom” bosh ijrochi direktori Yerjan Mukanov oldin Rossiyadan boyitilgan uran olgan Sharqiy Yevropadagi ba’zi atom stansiyalari 2025-yildan boshlab kompaniya bilan shartnoma tuzmoqchiligini aytib o‘tdi.
Unga ko‘ra, geosiyosiy noaniqliklar yadro yoqilg‘isi oqimini o‘zgartirmoqda, bu esa ba’zi energiya ishlab chiqaruvchilarini zaxira yig‘ishga undamoqda.
“Biz ishlab chiqarish uchun zaxiralarni tayyorlayapmiz, shuning uchun bozor talablariga javob bera olamiz, — dedi Mukanov.
AQSH ham dunyodagi eng yirik yadro yoqilg‘isi yetkazib beruvchisi — Rossiyadan boyitilgan uranga qaramlikni kamaytirishga intilayotgan davlatlar qatorida.
Hozircha bu Rossiyaning Ukrainadagi urushi ortidan yadro eksportining o‘sishiga to‘sqinlik qilish uchun yetarli bo‘lmadi, mamlakat daromadlarini oshirib, butun dunyo bo‘ylab yangi xaridorlarga ta’sirini kuchaytirdi.
Jahon Yadro Assotsiatsiyasi o‘tgan yili reaktor quvvatining 16 foizga oshganini nazarda tutib, uranga bo‘lgan talab 2030-yilga borib uchdan bir qismga o‘sishini ta’kidladi.
Dunyodagi uranning 40 foizdan ortig‘ini ishlab chiqaradigan Qozog‘iston bu yil ishlab chiqarishni 22 ming tonnaga yaqin darajada ushlab turishni rejalashtirmoqda.
“Biz uranga bo‘lgan talabning oshishini prognoz qilyapmiz, ammo narxlarning keskin o‘sishidan manfaatdor emasmiz”, — dedi Mukanov.
“Kazatomprom” bu yil uchinchi eksport yo‘lini ochishni rejalashtirmoqda — uran Xitoy portlaridan biri orqali jo‘natiladi. Ayni paytda kompaniya atom yoqilg‘isini Rossiya va Kaspiy dengizi orqali Qora dengizga jo‘natadi.
Mukanovga ko‘ra, yangi atom elektr stansiyalarini yuklash va o‘z zaxiralarini oshirish uchun uran izlayotgan Xitoydan talab ortib bormoqda. Pekinning maqsadi “uzluksiz uzoq muddatli ta’minot” ga ega bo‘lishdir.
Izoh (0)