Qozog‘iston prezidenti Qosim-Jo‘mart To‘qayev Slovakiya bosh vaziri Robert Fitsoga uyushtirilgan suiqasdni qoraladi. Bu haqda Akorda matbuot xizmati xabar berdi.
Slovakiya bosh vaziri Robert Fitsoning hayotiga suiqasd uyushtirilgani munosabati bilan prezident Qosim-Jo‘mart To‘qayev oqlab bo‘lmaydigan bu qabih terrorchilik harakatini keskin qoralashi va rad etishini bildirdi, — deyiladi xabarda.
To‘qayevning ta’kidlashicha, Qozog‘iston va Slovakiyani uzoq yillik do‘stlik va o‘zaro manfaatli hamkorlik rishtalari bog‘lab turadi. Bunda bosh vazir Robert Fitso katta rol o‘ynadi.
Davlat rahbari Qosim-Jo‘mart To‘qayev Robert Fitsoga tezroq sog‘ayib ketishini tiladi, — deya qo‘shimcha qildi Akorda.
Slovakiya bosh vaziriga suiqasd
15-may kuni tushdan keyin Gandlova shahrida Slovakiya Vazirlar Mahkamasining majlisi bo‘lib o‘tdi. Tadbirdan so‘ng bosh vazir Robert Fitso yig‘ilish o‘tayotgan binodan chiqib, yaqin atrofda to‘plangan fuqarolarning oldiga bordi.
Shu payt olomon orasida turganlardan biri o‘qotar qurolni chiqarib, bosh vazirga o‘q uzishni boshlagan. Erkak siyosatchining ko‘krak qafasi va qorniga jarohat yetkazgan, shundan so‘ng u voqea joyida navbatchilik qilayotgan huquq-tartibot idoralari xodimlari tomonidan qo‘lga olingan. Xavfsizlik xodimlari, o‘z navbatida, Fitsoni mashinaga o‘tqazib, mahalliy shifoxonalardan biriga olib ketgan.
Keyinchalik Fitso jarrohlik amaliyotini o‘tashi uchun boshqa yuqori darajadagi shifoxonaga o‘tkazilgan. Hozirda Slovakiya bosh vaziri operatsiya qilingan va uning hayoti xavf ostida emas.
Ma’lum bo‘lishicha, suiqasd 71 yoshli yozuvchi tomonidan sodir etilgan. Sintula muxolifatdagi “Progressiv Slovakiya” partiyasi tarafdori va Fitsoni siyosati uchun bir necha bor tanqid qilgan. U suiqasdni siyosiy sabablarga ko‘ra, jumladan, Vazirlar Mahkamasining OAV erkinligini cheklashga qaratilgan harakatlaridan norozilik maqsadida qilganini aytgan.
Izoh (0)