Turkiya prezidenti Rajab Toyyib Erdo‘g‘on AQSHga tashrifini va Jo Bayden bilan rejalashtirilgan uchrashuvini tomonlarning bandligi sababli bekor qildi. Bu haqda Turkiya yetakchisi Gretsiyaning Kathimerini gazetasiga bergan intervyusida ma’lum qildi.
Turkiya Tashqi ishlar vazirligi avvalroq taʼkidlaganidek, Erdo‘g‘onning AQSHga tashrifi 9-mayga belgilangandi, biroq u “jadvallardagi nomuvofiqlik tufayli har ikki tomon uchun qulay bo‘lgan” kechroq sanaga ko‘chirildi. Erdo‘g‘onning so‘zlariga ko‘ra, hozirda tegishli sana muhokama qilinmoqda.
Bizning AQSHga tashrifimiz ikki tomonning grafik bir-biriga to‘g’ri kelmasligi sababli qoldirildi, ma‘lumki, AQSH saylovlar arafasida va janob Baydenning ish grafiki yanada tig‘iz. Bunday tashriflar har ikki tomon uchun qulay vaqtda amalga oshiriladi, — dedi Turkiya prezidenti.
Avvalroq Turkiyaning T24 gazetasi rejalashtirilgan tashrifning uzilishiga Turkiyaning Iroq shimolidagi harbiy amaliyoti bo‘yicha kelishmovchilik va Vashingtonning Anqaraga iqtisodiy yon bosishi haqidagi umidlarining bajarilmagani sabab bo‘lishi mumkinligini yozgandi.
Hurriyet gazetasi manbalariga tayanib, Turkiya qurolli kuchlari Erdo‘g‘onning Iroqqa tashrifidan so‘ng mamlakatda taqiqlangan Kurdiston ishchilar partiyasiga qarshi quruqlikdagi operatsiya o‘tkazishini ma’lum qildi. Operatsiya yoz oylarida o‘tkazilishi mumkin.
Erdo‘g‘on Anqara yozda Iroq bilan “chegara xavfsizligi masalasini hal qilishni” kutayotganini bir necha bor ta’kidlagan. Uning so‘zlariga ko‘ra, Turkiya tomoni Suriyada 30-40 kilometr chuqurlikda xavfsizlik koridorini yaratishga ham intilmoqda.
Izoh (0)