Туркия президенти Ражаб Тоййиб Эрдўғон давлат тўнтариши хавфи ҳақидаги огоҳлантиришдан сўнг хавфсизлик кучлари раҳбарлари билан тунда фавқулодда йиғилиш ўтказди. Бу ҳақда Sabah хабар берди.
Бунгача Туркия хавфсизлик бошқармасидан бир неча ходим ишдан бўшатилганди. Улар “Айхан Бора Каплан” жиноий ташкилоти билан алоқадорликда айбланган. Рақамли материалларни мусодара қилиш учун уларнинг уйлари тинтув қилинган.
Туркия Миллатчи ҳаракати партияси раиси Девлет Баҳчели парламентдаги фракция йиғилишида содир бўлган воқеа мамлакат раҳбарини ағдаришга қаратилган фитнадан дарак бериши мумкинлигини айтган. У бир нечта полициячининг ишдан олиниши ҳеч нарсани ҳал қилмаслигини билдирган.
Шундан сўнг Эрдўғон Туркия адлия вазири Йилмаз Тунч ва Миллий разведка ташкилоти раҳбари Иброҳим Калин билан тунги фавқулодда йиғилиш ўтказган.
Маълумот ўрнида, 2016 йилда Туркияда давлат тўнтаришига уриниш бўлиб, бир неча соат ичида бостирилганди. Мамлакат бўйлаб тўқнашувлар натижасида 241 киши ҳалок бўлган, 2 мингдан ортиқ киши тан жароҳати олган. Туркияда давлат тўнтаришини ташкиллаштириш ва унга алоқадорликда гумонланиб 40 мингдан ортиқ одам ҳибсга олинган. Мамлакатда бир неча ой давомида фавқулодда ҳолат жорий этилган.
Изоҳ (0)