Xorazm viloyati Urganch shahrida YPX xodimining to‘xtash ishorasiga bo‘ysunmay, yo‘lovchilari bilan birga qochgan taksichi qo‘lga olindi, deb xabar beradi viloyat IIB axborot xizmati.
Qayd etilishicha, yo‘lovchi tashish faoliyati bilan shug‘ullanuvchi Gentra rusumli avtomashina haydovchisi 2-may kuni Urganch shahrining Gurlan ko‘chasida yo‘l harakati qoidalarini chetlab o‘tib, svetoforning qizil chirog‘ida yo‘lning qarama-qarshi bo‘lagidan harakatlangan.
YPX inspektori tomonidan unga to‘xtash ishorasi berilgan. Haydovchi qonuniy talabni bajarmay, katta tezlikda harakatlanib, nomaʼlum tomonga ketib qolgan.
Avtomashina ichida yo‘lovchilar ham bo‘lgan, ular haydovchidan yo‘lda tushirib qoldirishni iltimos qilgan. Ijtimoiy tarmoqlarda tarqalgan videoda avtomashina old o‘rindig‘idagi yo‘lovchi qiz haydovchidan to‘xtashni so‘ragani, biroq haydovchi mashinani to‘xtatmagani, so‘ngra yo‘lovchi oynani sindirishga uringanini ko‘rish mumkin. Keyinchalik haydovchi yo‘lovchilarni Yangibozor tumanidagi notanish joyga tashlab ketgan.
Shundan keyin ular haydovchiga nisbatan qonuniy chora ko‘rishni so‘rab, Ichki ishlar organlariga murojaat qilgan. Xorazm viloyati IIB tomonidan haydovchining shaxsiga aniqlik kiritilib, Maʼmuriy javobgarlik to‘g‘risidagi kodeksning bir necha moddalari bilan ish qo‘zg‘atilgan, avtomashinasi jarima maydoniga qo‘yilgan.
Jinoyat ishlari bo‘yicha Urganch shahri sudi haydovchini BHM 12 baravari (4 million 80 ming so‘m) miqdorida jarimaga tortgan.
Bundan oldin Qoraqalpog‘istondagi to‘yda tanasini mashinadan chiqarib tasvirga olgan operatorlar va haydovchi jarimaga tortilgan edi. Shuningdek, Andijonda 20 yoshli qiz mashinadan tanasini chiqarib harakatlangani, Samarqandda harakatlanayotgan Gentra’dan tanasini chiqarib, soxta dollar sochgan yigitlarga chora ko‘rilgani to‘g‘risida xabar berilgandi.
Izoh (0)