Makroiqtisodiy va hududiy tadqiqotlar instituti (MHTI) Toshkentdagi yirik supermarketlarda oziq-ovqat mahsulotlari narxini o‘rgandi.
Qayd etilishicha, MHTI mutaxassislari may oyida (tahlil 4-aprel va 2-may kunlari o‘tkazilgan) Toshkent shahridagi yirik supermarketlarda 21 nomdagi oziq-ovqat mahsulotlari narxining o‘zgarishini ko‘rib chiqqan.
Monitoring natijalari 10 xil mahsulot bo‘yicha minimal narxlar o‘tgan oydagiga nisbatan pasayganini ko‘rsatgan. Shunday qilib, bodringning narxi 49,0 foiz, sariq piyozning narxi 24,5 foiz, kartoshkaning narxi 16,9 foiz, olmaning narxi 16,7 foiz, karamning narxi 14,6 foiz, tuxumning narxi 11,7 foiz, qizil sabzining narxi 8,3 foiz, pomidorning narxi 6,3 foiz, tovuq go‘shtining (file) narxi 4,9 foiz, shakarning narxi 3,6 foiz pasaygan.
Shuningdek, 6 nomdagi mahsulotning eng past narxi o‘zgarishsiz qolgan. Bular: guruch, grechka, makaron, sut, margarin, kungaboqar yog‘i.
5 nomdagi mahsulotlar narxi oshgan. Narxining oshishi bo‘yicha banan yetakchi bo‘ldi. Banan narxining qisqa muddatli o‘sishi vaqtinchalik bozor omillari, talab va taklifning o‘zgarishi bilan bog‘liq.
Eslatib o‘tamiz, 2023-yil may oyida O‘zbekiston Markaziy banki 2023-yil birinchi choragi uchun “Iste’mol kayfiyati sharhi”ni e’lon qilgandi. Tadqiqotda respondentlarning daromadlari va xarajatlari, ularning jamg‘armaga moyilligi, shuningdek, kelajakdagi ehtiyojlari tahlil qilingan. Euromonitor International ma’lumotlariga ko‘ra, o‘zbekistonliklar daromadining 46,5 foizini oziq-ovqatga sarflaydi.
Izoh (0)