Хоразм вилояти Урганч шаҳрида ЙПХ ходимининг тўхташ ишорасига бўйсунмай, йўловчилари билан бирга қочган таксичи қўлга олинди, деб хабар беради вилоят ИИБ ахборот хизмати.
Қайд этилишича, йўловчи ташиш фаолияти билан шуғулланувчи Gentra русумли автомашина ҳайдовчиси 2 май куни Урганч шаҳрининг Гурлан кўчасида йўл ҳаракати қоидаларини четлаб ўтиб, светофорнинг қизил чироғида йўлнинг қарама-қарши бўлагидан ҳаракатланган.
ЙПХ инспектори томонидан унга тўхташ ишораси берилган. Ҳайдовчи қонуний талабни бажармай, катта тезликда ҳаракатланиб, номаълум томонга кетиб қолган.
Автомашина ичида йўловчилар ҳам бўлган, улар ҳайдовчидан йўлда тушириб қолдиришни илтимос қилган. Ижтимоий тармоқларда тарқалган видеода автомашина олд ўриндиғидаги йўловчи қиз ҳайдовчидан тўхташни сўрагани, бироқ ҳайдовчи машинани тўхтатмагани, сўнгра йўловчи ойнани синдиришга уринганини кўриш мумкин. Кейинчалик ҳайдовчи йўловчиларни Янгибозор туманидаги нотаниш жойга ташлаб кетган.
Шундан кейин улар ҳайдовчига нисбатан қонуний чора кўришни сўраб, Ички ишлар органларига мурожаат қилган. Хоразм вилояти ИИБ томонидан ҳайдовчининг шахсига аниқлик киритилиб, Маъмурий жавобгарлик тўғрисидаги кодекснинг бир неча моддалари билан иш қўзғатилган, автомашинаси жарима майдонига қўйилган.
Жиноят ишлари бўйича Урганч шаҳри суди ҳайдовчини БҲМ 12 баравари (4 миллион 80 минг сўм) миқдорида жаримага тортган.
Бундан олдин Қорақалпоғистондаги тўйда танасини машинадан чиқариб тасвирга олган операторлар ва ҳайдовчи жаримага тортилган эди. Шунингдек, Андижонда 20 ёшли қиз машинадан танасини чиқариб ҳаракатлангани, Самарқандда ҳаракатланаётган Gentraъдан танасини чиқариб, сохта доллар сочган йигитларга чора кўрилгани тўғрисида хабар берилганди.
Изоҳ (0)