Xorazm, Samarqand va Farg‘ona viloyatlarida elektr tarmoqlariga noqonuniy ulanish holatlari fosh etildi, deb xabar beradi Bosh prokuratura huzuridagi departament.
Qayd etilishicha, departamentning Gurlan tuman bo‘limi tomonidan ETK xodimlari bilan hamkorlikda tergovga qadar tekshiruv o‘tkazilgan. Tekshiruvda tumandagi “O.D.” fermer xo‘jaligi masʼul shaxslari ikkita suv nasosini tijorat maqsadida hisoblagichdan tashqari elektr tarmog‘iga ulab, jami 233,5 million so‘mlik elektr energiyasidan noqonuniy foydalangani aniqlangan.
Xuddi shunday, departamentning O‘zbekiston tuman bo‘limi tomonidan o‘tkazilgan tergovga qadar tekshiruvda “Z.P.” fermer xo‘jaligi rahbari A.X. xo‘jalikning dala maydonidagi suv nasosini elektr tarmog‘iga to‘g‘ridan to‘g‘ri ulab, jami 143,2 million so‘mlik elektr energiyasidan noqonuniy foydalangani ma’lum bo‘lgan.
Departamentning Jomboy tuman bo‘limi tomonidan o‘tkazilgan tergovga qadar tekshiruvda esa “J.a.” oilaviy korxonasi rahbari ishlab chiqarish sexi binosidagi uskunalarni elektr tarmog‘iga to‘g‘ridan to‘g‘ri yashirincha ulab, jami 136,4 million so‘mlik elektr energiyasidan noqonuniy foydalangani aniqlangan.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq poytaxtda elektr energiyasiga noqonuniy ulanib, davlat manfaatlariga 1,5 milliard so‘mlik zarar yetkazgan mayning ferma aniqlangani to‘g‘risida xabar berilgandi. Shuningdek, Jizzaxda ikkita mayning ferma davlatga salkam yarim milliard so‘m zarar yetkazgani ma’lum bo‘lgan, Toshkent viloyatida 733 mln so‘mlik elektr energiyasidan noqonuniy foydalangan mayning ferma aniqlangan edi.
Izoh (0)