Namanganda 7 yoshli qizni zo‘rlaganlikda ayblanayotgan erkak qamoqqa olingandi. Viloyat IIB holat yuzasidan qo‘shimcha ma’lumot berdi.
68 yoshli erkak B.I. dastlab 7 yoshli qizga buzuq harakatlar qilganlikda gumonlanib, 5-aprel kuni Jinoyat kodeksining 129-moddasi 1-qismi (16 yoshga to‘lmagan shaxsga nisbatan uyatsiz-buzuq harakatlar qilish) bilan jinoyat ishi qo‘zg‘atilgandi.
1-may kuni jinoyat ishi Jinoyat kodeksining 119-moddasi (jinsiy ehtiyojni zo‘rlik ishlatib g‘ayritabiiy usulda qondirish) 4-qismi bilan qayta malakalandi va ayblanuvchiga qamoq ehtiyot chorasi qo‘llandi.
Ijtimoiy tarmoqlarda erkakning boshqa qizlarga nisbatan ham shu kabi holatlarni sodir etgani haqida xabarlar tarqaldi. Viloyat IIB matbuot xizmatining bildirishicha, ayblanuvchini boshqa shaxslarga nisbatan ham shu kabi holatlarni sodir etgan yoki etmagani tergov harakatlari doirasida o‘rganilmoqda.
IIB mazkur jinoyat ishi bo‘yicha ayblanuvchi ichki ishlar hamda prokuratura organlariga aloqador emasligini hamda bu maʼlumotlar asossiz ekanini qo‘shimcha qildi.
Izoh (0)