Toshkent shahri, Shayxontohur tumanida yashovchi 39 yoshli B.R. ichki ishlar organlariga murojaat qilib, bank kartasidan 11 mln 719 ming so‘m miqdoridagi pul mablag‘lari nomaʼlum shaxs tomonidan o‘zlashtirilganligini maʼlum qilgan. Bu haqda Kiberxavfsizlik markazi xabar berdi.
Maʼlum qilinishicha, o‘tkazilgan tezkor-qidiruv tadbirlari natijasida mazkur jinoyatni Farg‘ona viloyati, O‘zbekiston tumanida yashovchi 20 yoshli X.Z. sodir etganligi aniqlangan.
Gumonlanuvchi sifatida tergov organlariga jalb etilgan X.Z. Telegram orqali turli xil mazmunidagi xabarni (havola) jo‘natib, ularni qiziqtirib, bank karta maʼlumotlarini qo‘lga kiritish orqali bank kartalarida saqlangan pullarni o‘g‘irlab, qing‘ir yo‘llar bilan boylik orttirib kelayotganligi maʼlum bo‘ldi.
Mazkur holat yuzasidan X.Z.ga nisbatan JKning 169-moddasi (o‘g‘rilik) 3-qismi bilan jinoyat ishi qo‘zg‘atildi.
Izoh (0)