G‘azo sektorida so‘nggi 24 soatda yuz bergan janglarda kamida 50 nafar Isroil askari yaralangan. Bu haqda Isroil mudofaa kuchlari tarqatgan xabarga asoslanib, Al Jazeera nashri xabar berdi.
Manbada aytilishicha, HAMAS kuchlari va Isroil armiyasi o‘rtasida quruqlikdagi janglar nisbatan faollashgan. Rafah shahrining shimoliy qismida ochiq janglar boshlanib ketgan.
G‘azo shimolidagi Al-Junayna va as-Salam aholi punktlariga Isroil tanklari kirgan. Mudofaa kuchlari bu hududlarda nisbatan muvaffaqiyatga erishgani xabar qilingan.
Falastin qurolli guruhlari Isroilga qarshi qisqa masofali raketalardan foydalanayotgani aytilgan. Tanklarga hujum qilish uchun HAMAS askarlari tomonidan tankka qarshi raketalardan foydalanilgani dalillari topilgan.
So‘nggi 24 soat ichida amalga oshirilgan amaliyotlarda jarohatlangan 50 nafar askar harbiy shifoxonalarga olib ketilgan. Isroil rasmiylari halok bo‘lgan askarlari haqidagi yangilangan statistikani eʼlon qilmagan.
Tahlilchilar Isroil hujumlarni qaytadan faollashtirishni maqsad qilganini maʼlum qilgan. Agar bu amalga oshirilsa, G‘azo shimoli va markaziga qo‘shimcha harbiy qismlar kiritilishi mumkinligi bildirilgan.
Izoh (0)