Rossiya 13-may kuni tongda Ukrainaga tegishli 31 ta harbiy dron mamlakat chegarasida urib tushirilganini maʼlum qildi. Bu haqda Rossiya Mudofaa vazirligi maʼlumotlariga asoslanib, The Moscow Times nashri xabar berdi.
Manbada aytilishicha, dushanba tongida Ukraina tomonidan Rossiya chegara hududidagi harbiy va fuqarolik obyektlariga, shuningdek, Qrim hududiga harbiy dronlar hujumi uyushtirilgan. Chegara hududidagi havo hujumida qarshi mudofaa inshootlari yordamida uchar qurilmalar urib tushirilgan.
“Tunda Kiyev rejimining uchuvchisiz havo vositalari yordamida Rossiya Federatsiyasi hududidagi nishonlarga qarshi teraktlar uyushtirishga qaratilgan yangi urinishlari oldi olindi”, — deyiladi Rossiya Mudofaa vazirligi xabarida.
Ukraina bilan chegaradosh Belgorod viloyatida dushanba tongida 12 ta uchuvchisiz qurilma urib tushirilgani viloyat maʼmuriyati tomonidan tasdiqlangan. Dronlar hujumi oqibatida viloyat hududida 15 nafar fuqaro halok bo‘lgan.
Mudofaa vazirligining qo‘shimcha qilishicha, Ukraina bilan chegaradosh Rossiyaning Kursk viloyatida ham sakkizta dron yo‘q qilingan. To‘rtta dron Lipetsk viloyatida tutib olingan.
Qrimda ham dronlar urib tushirilgani bildirilgan. Havo hujumidan mudofaa tizimlari yettita dron va Buyuk Britaniya tomonidan yetkazib berilgan to‘rtta Storm Shadow raketasini yo‘q qilgani xabar qilingan.
So‘nggi oylarda Kiyev Moskvaning benzin va dizel ishlab chiqarishini susaytirish maqsadida Rossiya neftni qayta ishlash zavodlarini nishonga olgani xabar qilingan. Bu strategik hujum Moskva nazorati ostidagi hududlarda yoqilg‘i muammosi keltirib chiqarish, neft qayta ishlash jarayonini uzib qo‘yish va buning ortidan urushni barqaror taʼminlab turgan moliyaviy manbani tugatishdan iborat uzoq maqsadlarni o‘z ichiga oladi.
Izoh (0)