Qo‘shma Shtatlar Isroil G‘azo sektorida Amerika qurollarini qo‘llab, xalqaro qonunlarni buzgan bo‘lishi mumkin, deb hisoblaydi. Bu haqda tegishli manbalarga tayanib, Deutsche Welle xabar berdi.
AQSH Davlat departamentining 10-may kuni e’lon qilingan hisobotiga ko‘ra, Isroil xalqaro huquqiy me’yorlarga to‘g‘ri kelmaydigan tarzda qurol ishlatgan, deyishga asos bor. Hisobotda yakuniy xulosalar mavjud emas.
G‘azo sektoridagi mojaroning tabiati alohida holatlarga baho berish va aniq xulosalar chiqarishni qiyinlashtiradi, — deyiladi hujjatda.
Avvalroq AQSH prezidenti Jo Bayden o‘zining Demokratik partiyasi tanqidchilari bosimi ostida G‘azodagi tinch aholining ahvolidan xavotirlanib, AQSHdan harbiy yordam olayotgan davlatlarni inson huquqlari bo‘yicha qonunlarga rioya qilishlariga kafolat berishga chaqirgandi.
Davlat departamenti hisobotida ta’kidlanishicha, bir qator jiddiy xavotirlarga qaramay, AQSHdan harbiy yordam olayotgan barcha davlatlar, jumladan, Isroil, Kolumbiya, Eron, Keniya, Nigeriya, Somali va Ukraina bunday kafolatlarni taqdim etib, AQSH ularga harbiy yordam berishda davom etishiga imkon yaratgan.
Isroil ham AQSH Kongressiga o‘z kafolatlarini taqdim etgan.
Ammo Isroilning AQSHda ishlab chiqarilgan qurollarga jiddiy qaramligini hisobga olsak, Isroil kuchlari 7-oktyabr kuni HAMASning ommaviy hujumidan so‘ng xalqaro huquq bo‘yicha o‘z majburiyatlariga mos kelmaydigan turli yo‘llar bilan qurol ishlatgan, deb aytishga asos bor, —deyiladi davlat departamenti hisobotida.
Izoh (0)