“Aholi zich joylashgan hududlarda operatsiya o‘tkazilmaydi” — Isroil armiyasi vakili

Isroil armiyasi vakili Daniel Hagariy Rafahda HAMASga qarshi amaliyotlar taktik xarakterga ega ekanini aytib, aholi zich joylashgan hududlarda hujumlar o‘tkazilmasligini ma’lum qildi. Bu haqda Deutsche Welle xabar berdi.

U Rafahga bostirib kirish boshlanishidan oldin ham shahar aholisi vaqtincha gumanitar hududlarga ko‘chib o‘tishga chaqirilganini eslatdi. Hagariyning ta’kidlashicha, Isroil G‘azo sektori aholisi bilan emas, HAMAS bilan kurashmoqda.

Isroil harbiylari tinch aholiga insonparvarlik yordami yetkazish ustida ishlamoqda, — deya qo‘shimcha qilgan u.

Avvalroq Isroilda bosh vazir Binyamin Netanyaxu hukumatiga qarshi shiddatli namoyishlar bo‘lib o‘tgan edi.

Netanyaxu hokimiyatda ekan, bizning garovga olinganlar qaytmaydi. Netanyaxu Isroilni butunlay qulashiga olib keladi, — degan namoyishchilar.

Shuningdek, Isroil armiyasi bosh shtabi boshlig‘i Gerzi Halevi Isroilning harbiy amaliyotlar yakunlanganidan so‘ng G‘azo sektorida yangi fuqarolik boshqaruvini yaratish bo‘yicha siyosiy strategiyasi yo‘qligini tanqid qilgan edi.