A-373 avtomobil yo‘lining Qamchiq dovonidan o‘tuvchi 228,8-kilometrida kuchli jala oqibatida yo‘lning harakat qismini loy va qumtoshli massa qopladi. Bu haqda “Qamchiqavtoyo‘l” xabar berdi.
Favqulodda vaziyatlar vazirligiga ko‘ra, hodisa oqibatlarini bartaraf etish bo‘yicha FVV, YHXX hamda “Qamchiqavtoyo‘l” IYFUK xodimlari tomonidan tezkor choralar ko‘rilgan.
Qayd etilishicha, kuch vositalari yordamida muammoni bartaraf etish bo‘yicha olib borilgan zarur amaliy harakatlar natijasida yo‘lning Toshkent —Vodiy yo‘nalishi soat 00:55 da avtomobillar harakati uchun ochilgan. Soat 02:45 da esa Vodiy—Toshkent yo‘nalishi ham ochildi.
Hodisa oqibatida tan jarohati olgan va halok bo‘lganlar yo‘q. Vaziyat nazoratga olingan. FVV xodimlari tomonidan dovonda qolib ketgan haydovchi va yo‘lovchilarga chodirlarda issiq ichimlik va yeguliklar tarqatilib, yordam ko‘rsatilmoqda, — deyiladi xabarda.
“O‘zgidromet” 11-may kuni respublikaning tog‘li hududlarida havo biroz bulutli bo‘lib, yomg‘ir yog‘ishi, baʼzi joylarda kuchli bo‘lishi mumkinligi to‘g‘risida xabar bergandi.
Izoh (0)