Toshkent viloyatining Qibray tumanida kompyuter tarmog‘i muhandisi baxtsiz hodisa oqibatida halok bo‘ldi. Bu haqda viloyat Kambag‘allikni qisqartirish va bandlik boshqarmasi buyrug‘ida ma’lum qilingan.
Qayd etilishicha, 1-may kuni soat 17:20 larda Qibray tumani Universitet va Salar chorrahasidagi ustunga avtomobil radarini o‘rnatish ishlariga jalb qilingan 26 yoshli kompyuter tarmog‘i muhandisi Sardorbek Madaminov tok urishi oqibatida vafot etgan.
U 6,5 metr balandlikda elektr simlarini ulash jarayonida havo elektr uzatish tarmog‘iga tegib ketgan. Mazkur baxtsiz hodisani maxsus tekshirish uchun komissiya tuzilgan.
Auksion orqali radar
Tadbirkorlarga 2021-yilning 1-martidan boshlab yo‘llarga kameralar va radarlar o‘rnatishga ruxsat berilgan. Yer uchastkalari onlayn auksionlar orqali taqdim etiladi.
Auksion g‘oliblari uchastkalarni boshqa tadbirkorlarga o‘tkazish huquqi bilan cheklanmagan muddatga oladi. 2021—2022-yillarda shu tarzda 3356 ta videokamera va 763 ta radar o‘rnatilgan.
Ma’lumot uchun, 2021-yil iyun oyidan boshlab O‘zbekistondagi chorraha hamda yo‘llarda radar va kamera o‘rnatish joylari auksion orqali savdoga qo‘yilishi boshlangandi. 1-iyul kuni “E-auksion” saytida birinchi bor Toshkent shahrida radar o‘rnatiladigan joylar auksionga chiqarilgan.
Izoh (0)