Xitoy janubi-sharqidagi Guandun provinsiyasida bolalar bog‘chasiga qilingan hujum oqibatida olti kishi halok bo‘ldi, bir kishi yaralandi. Bu haqda BBC’ga politsiya xabar berdi.
Huquq-tartibot idoralari ma’lum qilishicha, Vu familiyali 25 yashar erkak hibsga olingan. AFP agentligi shahar hukumati vakiliga tayanib, aniqlik kiritishicha, hujum Lyantszyan okrugidagi bolalar bog‘chasiga uyushtirilgan, qurbonlar — bir tarbiyachi, ikki ota-ona va uch nafar tarbiyalanuvchi.
Politsiya voqeani “qasddan hujum” deb atadi, erkak hujumdan 20 daqiqa o‘tib hibsga olingan. Weibo xabar berishicha, hujumchining ismi Vu Mutsze bo‘lib, voqea hozircha tergov qilinmoqda.
Eslatib o‘tamiz, 2021-yilda Xitoy janubidagi Guansi-Chjuan avtonom tumanidagi bolalar bog‘chasiga bir erkak pichoq bilan hujum qilgandi. Oqibatda 18 kishi jarohatlangan — 16 bola va ikki o‘qituvchi.
2018-yilda Xitoyning Shensi provinsiyasida noma’lum shaxs o‘rta maktab o‘quvchilariga hujum qilishi oqibatida yetti nafar o‘quvchi halok bo‘lgan, yana 12 nafari jarohatlangan. Qotil qo‘lga olingan.
Izoh (0)